«Zeket jáne qaıyrymdylyq» qory 500 balaǵa avtooryndyq úlestirdi (FOTO)
Búgin QMDB «Zeket jáne qaıyrymdylyq» qorynyń uıytqy bolýymen «Bala qaýipsizdigi – basty mindet» dep atalatyn aktsııa aıasynda 500 balaǵa avtooryndyq taratyldy. Izgi sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysyp, jyly lebizin bildirdi.
Bas múftı: «Memleket basshysy Qasym-Jomart Kemeluly osy jyldy «Balalar jyly» dep bekitti. Prezıdentimiz birinshi kezekte bılik tarapynan balalardy qorǵaý úshin densaýlyq saqtaý, bilim berý, áleýmettik qoldaý baǵytynda naqty sharalar qolǵa alynýy kerek ekenin aıtty. Biz de óz tarapymyzdan osy jyldyń aıasynda balalarǵa qamqorlyq kórsetýdi bastap kettik. Ózderińizge belgili «Zeket jáne qaıyrymdylyq» qorynyń «El úlesi – páterge» dep atalatyn jobasy bar. Sol joba aıasynda qanshama ata-ana, sol úıdegi qanshama búldirshin qýanyshqa keneldi. Búgingi jobamyzdyń jóni bólek. Balalardyń qaýipsizdigi basty orynda. Sábıler aýyrmasyn, ómiri uzaq bolsyn! Óskeleń urpaq qaýipsiz, beıbit mekende ósip, bolashaǵy jarqyn bolsyn», – dep aqjarma tilegin arnady.
Qor dırektory Qanat Qydyrmınniń aıtýynsha, zamanaýı avtooryndyqtardy zeket qyzmetkerleri polıtsııa basqarmasymen birige otyryp, balabaqshalarǵa úlestirdi.
