JÚREGIM TAZA DEP NAMAZ OQYMASA BOLAMA?

Suraq:

Júregim taza dep namaz oqymasa bolama?

Ответ

Jaýap:

Qazirgi oqyǵan-toqyǵan, jasy egdelegen aǵalarymyzdyń arasynda mynadaı bir pikir bar: «Meniń júregim taza, kóńilim pák, namaz oqyp qaıtpekpin…» deıdi.  Osyny estigende namaz oqyp júrgenimiz úshin uıalyp qalady ekensiń, beıne bir júregi qaraıyp ketip ǵıbadat jasap júrgen adam sııaqty. Buǵan ne aıtasyz?

– Mundaı túsinik qulshylyqtyń túp mánin jetik túsinbeýden týyndaıdy. Namaz – tek kúnáharlar men moldalarǵa ǵana júktelgen jeke mindet emes, árbir adamnyń moınyna jazylǵan asyl paryz. Quranda Alla Taǵala: «Men adamdar men jyndardy meni tanyp, maǵan ǵana ǵıbadat etsin dep jarattym» deıdi. Sondyqtan qulshylyq – adamzat jaratylysynyń negizgi maqsaty. Al ǵıbadat-qulshylyqtyń eń ulysy – namaz. Júregi taza, kóńili pák adamdar kerisinshe namazdy kóbirek oqýlary tıis. Quldyń namaz oqýy – kúnásiniń kóptigi emes, kerisinshe, onyń Qudaıǵa bir qadam jaqyn ekendiginiń belgisi. Qurannyń «Baqara» súresiniń 3-aıatynda: «Taqýa jandar namazdaryn tolyq oryndaıdy»-delinse, «Ankabýt» súresiniń 45-aıatynda: «Shynaıy namaz adamdy arsyzdyq pen jamanshylyq ataýlydan tyıady» – deıdi.

Eger de namazdy júregi kirlegen adamdar ǵana oqıtyn bolsa, onda kúnádan pák júregi tap-taza paıǵambarymyz Muhammed (Oǵan Allanyń ıgiligi men sálemi bolsyn) pen onyń izbasar sahabalary bes ýaqyt namazyn qalt jibermeı oqydy ǵoı. Alda-jala júreginiń tazalyǵy úshin namaz oqymaý mindet etiletin bolsa ol adam – Allanyń elshisi Muhammed (Oǵan Allanyń ıgiligi men sálemi bolsyn) bolar edi. Paıǵambarymyz bes ýaqyt namazdy bylaı qoıyp, tún jarymda táhájjýd namazyn egilip oqyǵanyn qaıtesiz!

Júregim taza, kóńilim pák, deýdiń arǵy jaǵynda asa beıǵamdyq, naqtyraq aıtqanda tákapparlyq jatyr. Tákapparlyq shaıtannyń sıpaty. Mundaı sıpat boıynda bar adamǵa jumaq alys. Júregi taza adam Allanyń buıryǵyn oryndamaýǵa haqysy joq. Ondaı adamdar «júregim taza, kóńilim pák, kúnám joq» deýmen-aq kúnáhár bolady.

Kúnásiniń bar ekenin bilmegen adam – kúnásin moıyndamaǵan adamnan áldeqaıda jaman. Joǵarydaǵy adasqan túsiniktiń astarynda Jaratýshynyń ámiri­ne boıusynbaý, Qurannyń úkimine beıǵamdyq tanytý sııaqty jaman áreketter jatyr. Qysqasy bul namaz oqyǵysy kelmegen pendeniń syltaýy. Asa qaterli qubylys.

 

Qaırat JOLDYBAIULY

Автор: Қожанов Қасым